ఎండాకాలం ముగిసి వర్షాకాలం ప్రారంభమైతే వేడి నుంచి ఉపశమనం లభించినా, మరోవైపు కొన్ని ఆరోగ్య సమస్యలు కూడా మొదలవుతాయి. ముఖ్యంగా వర్షాల కారణంగా అక్కడక్కడా నీరు నిల్వ ఉండటం వల్ల దోమలు వేగంగా పెరుగుతాయి. దీంతో డెంగ్యూ, మలేరియా, చికెన్గున్యా వంటి ప్రమాదకర వ్యాధులు వ్యాపించే అవకాశాలు అధికమవుతాయి. మార్కెట్లో లభించే కెమికల్ ఆధారిత దోమల నివారణ ఉత్పత్తులు — కాయిల్స్, లిక్విడ్స్ వంటివి — శ్వాసకోశ సమస్యలకు కారణమయ్యే ప్రమాదం ఉంది. అందుకే ఇంట్లోనే దొరికే సహజసిద్ధమైన పదార్థాలతో, ఎలాంటి దుష్ప్రభావాలు లేకుండా దోమలను ఎలా దూరం పెట్టుకోవచ్చో తెలుసుకుందాం.
వేప నూనె – కొబ్బరి నూనె మిశ్రమం
ఆయుర్వేదంలో వేపకు కీటకాలను తరిమికొట్టే శక్తి ఉందని చెబుతారు. దోమలను నివారించడంలో వేప నూనె ఎంతో ప్రభావవంతంగా పనిచేస్తుంది. సమాన పరిమాణంలో వేప నూనె మరియు కొబ్బరి నూనె తీసుకుని బాగా కలపాలి. ఈ మిశ్రమాన్ని చేతులు, కాళ్లకు రాసుకుంటే దోమలు దగ్గరకు రావు. అలాగే ఈ నూనెతో ఇంట్లో దీపం వెలిగిస్తే వచ్చే పొగ దోమలను వెంటనే పారద్రోలుతుంది.
కర్పూరం – ఎండిన తులసి ఆకుల పొగ
దోమలను తరిమికొట్టేందుకు కర్పూరం కూడా మంచి సహజ మార్గంగా ఉపయోగపడుతుంది. ఇంటి తలుపులు, కిటికీలు మూసివేసి ఒక చిన్న పాత్రలో రెండు లేదా మూడు కర్పూర బిళ్లలు వెలిగించి గదిలో ఉంచాలి. సుమారు 15 నుంచి 20 నిమిషాల తర్వాత గమనిస్తే దోమలు కనిపించకుండా పోతాయి. మరింత మంచి ఫలితం కోసం కర్పూరంతో పాటు ఎండిన తులసి ఆకులు లేదా వేపాకులు కలిపి కాల్చవచ్చు. వాటి నుంచి వచ్చే సువాసన గల పొగ సహజ క్రిమిసంహారిణిలా పనిచేసి దోమలను దూరం చేస్తుంది.
నిమ్మకాయ – లవంగాల సింపుల్ చిట్కా
ఇది చాలా సులభమైన మరియు ఇంటికి మంచి సువాసనను ఇచ్చే పద్ధతి. ఒక నిమ్మకాయను రెండు ముక్కలుగా కోసి, ప్రతి ముక్కలో 10 నుంచి 15 లవంగాలు గుచ్చాలి. ఈ ముక్కలను పడకగదిలో లేదా దోమలు ఎక్కువగా వచ్చే కిటికీల దగ్గర ఉంచాలి. నిమ్మకాయలోని సిట్రస్ వాసన, లవంగాల ఘాటైన సువాసన దోమలకు అసహ్యంగా ఉండటంతో అవి ఆ ప్రాంతానికి రావడం తగ్గుతుంది.
లావెండర్ – సిట్రోనెల్లా ఆయిల్స్ ఉపయోగం
లావెండర్ ఆయిల్, సిట్రోనెల్లా ఆయిల్ లేదా యూకలిప్టస్ (నీలగిరి) ఆయిల్స్ కూడా దోమల నివారణలో బాగా సహాయపడతాయి. కొద్దిగా నీటిలో ఈ ఎసెన్షియల్ ఆయిల్స్ వేసి బాగా కలిపి స్ప్రే బాటిల్లో నింపాలి. ఈ మిశ్రమాన్ని కర్టెన్లు, సోఫాల వెనుక భాగాలు, చీకటి మూలలు వంటి ప్రదేశాల్లో స్ప్రే చేస్తే గదిలో మంచి సువాసన వ్యాపించడమే కాకుండా దోమలు కూడా తగ్గిపోతాయి.
పరిశుభ్రతే ఉత్తమ రక్షణ
ఇలాంటి చిట్కాలు పాటించడమే కాకుండా, దోమలు పెరగకుండా ముందస్తు జాగ్రత్తలు తీసుకోవడం కూడా చాలా అవసరం. వర్షాకాలంలో ఇంటి చుట్టూ ఉండే పాత కుండీలు, టైర్లు, ప్లాస్టిక్ డబ్బాల్లో నీరు నిల్వ ఉండకుండా చూసుకోవాలి. సాయంత్రం 5 గంటల తర్వాత కిటికీలు, తలుపులు మూసి ఉంచడం మంచిది. అలాగే ముదురు రంగు దుస్తులకంటే లేత రంగు దుస్తులు ధరించడం వల్ల కూడా దోమల కాట్ల నుంచి కొంతవరకు రక్షణ పొందవచ్చు.