చమురు ధరల పెరుగుదల, పశ్చిమాసియా ఉద్రిక్తతల ప్రభావంతో దేశీయ స్టాక్ మార్కెట్లు తీవ్ర ఒడిదుడుకులకు లోనవుతున్నాయి. సోమవారం ఉదయం 10.20 గంటల సమయానికి సెన్సెక్స్ 629 పాయింట్లు నష్టపోయి 72,142 వద్ద ట్రేడవుతోంది. నిఫ్టీ కూడా 197 పాయింట్లు పతనమై 22,582 వద్ద కొనసాగుతోంది.
పశ్చిమాసియాలో నెలకొన్న ఉద్రిక్త పరిస్థితుల నేపథ్యంలో అంతర్జాతీయ మార్కెట్లలో చమురు ధరలు క్రమంగా పెరుగుతున్నాయి. బ్రెంట్ క్రూడ్ ధర 1.5 శాతం పెరిగి బ్యారెల్‌కు 107 డాలర్లకు చేరింది. భారత్‌ తన చమురు అవసరాల్లో అధిక భాగాన్ని దిగుమతుల ద్వారా తీర్చుకుంటున్న నేపథ్యంలో క్రూడ్ ధరల పెరుగుదల దేశీయ మార్కెట్లపై ఒత్తిడి పెంచుతోంది.
అమెరికా అధ్యక్షుడు డొనాల్డ్‌ ట్రంప్‌ యుద్ధంలో అమెరికా విజయం సాధిస్తుందంటూ చేసిన వ్యాఖ్యలు కూడా మార్కెట్‌ సెంటిమెంట్‌పై ప్రభావం చూపినట్లు మార్కెట్‌ వర్గాలు చెబుతున్నాయి.
మరోవైపు, విదేశీ సంస్థాగత పెట్టుబడిదారులు (FIIs) భారత ఈక్విటీ మార్కెట్లలో అమ్మకాలను పెంచుతున్నారు. సెప్టెంబర్‌ 28న ఒక్కరోజే రూ.5,300 కోట్ల విలువైన పెట్టుబడులను వెనక్కి తీసుకున్నట్లు గణాంకాలు సూచిస్తున్నాయి. ఎఫ్‌ఐఐల విక్రయాలు కూడా సూచీలపై ఒత్తిడిని పెంచుతున్నాయి.
ఇదే సమయంలో అమెరికా ఫెడరల్‌ రిజర్వ్‌ వడ్డీ రేట్లను మరోసారి పెంచే అవకాశం ఉందన్న అంచనాలతో అమెరికా ట్రెజరీ బాండ్‌ ఈల్డ్స్‌ పెరుగుతున్నాయి. అధిక బాండ్‌ ఈల్డ్స్‌ కారణంగా అభివృద్ధి చెందుతున్న మార్కెట్ల నుంచి పెట్టుబడుల తరలింపుపై ఆందోళనలు వ్యక్తమవుతున్నాయి.
ఆసియా మార్కెట్లలోనూ ఇదే పరిస్థితి కనిపించింది. దక్షిణ కొరియా, జపాన్‌, హాంకాంగ్‌ ప్రధాన సూచీలు భారీ నష్టాలను నమోదు చేశాయి. అంతకుముందు అమెరికా స్టాక్ మార్కెట్లు కూడా నష్టాలతో ముగిశాయి.
చమురు ధరలు, పశ్చిమాసియా పరిణామాలు, విదేశీ పెట్టుబడుల ఉపసంహరణ, అమెరికా వడ్డీ రేట్లపై అంచనాలు.. ఇవన్నీ కలిసి ప్రస్తుతం భారత ఈక్విటీ మార్కెట్లపై ఒత్తిడిని పెంచుతున్నాయి.