టీమిండియా స్టార్ ఆల్రౌండర్ రవీంద్ర జడేజా టెస్టు క్రికెట్లో మరో అరుదైన ఘనత సాధించాడు. శ్రీలంకతో గాలే వేదికగా జరుగుతున్న తొలి టెస్టు మూడో రోజు 350 వికెట్ల మైలురాయిని అందుకున్నాడు. దీంతో టెస్టుల్లో 350కు పైగా వికెట్లు, 4,000కు పైగా పరుగులు చేసిన అరుదైన ఆటగాళ్ల జాబితాలో చేరాడు.
జడేజా ఈ మ్యాచ్కు ముందు 89 టెస్టుల్లో 4,095 పరుగులు, 348 వికెట్లు సాధించాడు. 350 వికెట్ల మార్క్ చేరుకోవడానికి రెండు వికెట్లు మాత్రమే అవసరం కాగా.. శ్రీలంక బ్యాటర్ కేశర నువంతను ఔట్ చేసి ఈ ఘనతను అందుకున్నాడు. శుభ్మన్ గిల్ క్యాచ్ పట్టడంతో జడేజా 350వ వికెట్ ఖాతాలో చేరింది.
ఈ ఘనతతో జడేజా.. కపిల్ దేవ్ సరసన ప్రత్యేక క్లబ్లో చోటు దక్కించుకున్నాడు. టెస్టుల్లో 4,000కు పైగా పరుగులు, 350కు పైగా వికెట్లు సాధించిన ఆటగాళ్లలో కపిల్ దేవ్, ఇయాన్ బోథమ్, డానియల్ వెట్టోరి తర్వాత జడేజా కూడా చేరాడు. అంతేకాదు.. టెస్టుల్లో 350 వికెట్లు తీసిన ఐదో భారత బౌలర్గా జడేజా నిలిచాడు. ఇంతకుముందు అనిల్ కుంబ్లే, రవిచంద్రన్ అశ్విన్, కపిల్ దేవ్, హర్భజన్ సింగ్ ఈ ఘనత సాధించారు.
ఎడమచేతి వాటం స్పిన్నర్లలో 350 వికెట్లతో జడేజా టెస్టు చరిత్రలో మూడో స్థానంలో నిలిచాడు. శ్రీలంక దిగ్గజం రంగనా హెరాత్ 433 వికెట్లతో మొదటి స్థానంలో ఉండగా.. డానియల్ వెట్టోరి 362 వికెట్లతో రెండో స్థానంలో ఉన్నాడు. ఇక ఈ మ్యాచ్లో అంతకుముందు శ్రీలంక కెప్టెన్ ధనంజయ డి సిల్వాను కూడా జడేజా ఔట్ చేశాడు.
అయితే బ్యాటింగ్లో మాత్రం జడేజా 13 పరుగులకే పెవిలియన్ చేరాడు. భారత్ తొలి ఇన్నింగ్స్లో 460/9 వద్ద డిక్లేర్ చేయగా.. దేవదత్ పడిక్కల్ 167 పరుగులతో టాప్ స్కోరర్గా నిలిచాడు.