హైదరాబాద్ నగర పరిధిలో సొంతిల్లు లేని పేద, మధ్యతరగతి కుటుంబాలకు రేవంత్ రెడ్డి ప్రభుత్వం తీపి కబురు అందించింది. ‘CURE’ ప్రాజెక్టు పరిధిలో నిర్మించనున్న ‘ఇందిరమ్మ ఇండ్ల టవర్స్’ నిర్మాణానికి ముఖ్యమంత్రి రేవంత్ రెడ్డి నేడు కేపీహెచ్బీ (KPHB) కాలనీలో శంకుస్థాపన చేయనున్నారు.
మొత్తం లక్ష ఫ్లాట్ల నిర్మాణమే లక్ష్యంగా పెట్టుకోగా, పైలట్ ప్రాజెక్టు కింద తొలి విడతలో రూ.807.40 కోట్ల అంచనా వ్యయంతో 16 అసెంబ్లీ నియోజకవర్గాల పరిధిలోని 18 ప్రాంతాల్లో 7,340 ఫ్లాట్లను నిర్మించనున్నారు.
ధర మరియు సబ్సిడీ వివరాలు:
- మొత్తం ఫ్లాట్ విలువ: రూ. 11 లక్షలు
- ప్రభుత్వ సబ్సిడీ: రూ. 5 లక్షలు
- లబ్ధిదారుడి వాటా: రూ. 6 లక్షలు
- వైశాల్యం: 400 చదరపు అడుగుల కార్పెట్ ఏరియా (528 చ.అడుగుల బిల్టప్ ఏరియా).
అర్హత నిబంధనలు:
- దరఖాస్తుదారు ప్రస్తుతం నివసిస్తున్న అసెంబ్లీ నియోజకవర్గ పరిధిలోని ప్రాజెక్టుకే అప్లై చేసుకోవాలి.
- కుటుంబ వార్షిక ఆదాయం రూ. 6 లక్షలు దాటకూడదు.
- CURE పరిధిలో సొంత ఇల్లు, ప్లాట్ లేదా ఫ్లాట్ ఉండకూడదు.
- ఒక కుటుంబానికి ఒక ఫ్లాట్ మాత్రమే కేటాయిస్తారు.
రిజర్వేషన్లు & ప్రాధాన్యత:
ఫిర్యాదులకు తావులేకుండా లాటరీ విధానంలో ఫ్లాట్లను కేటాయిస్తారు.
- ఎస్సీ (SC): 14% | ఎస్టీ (ST): 5% | బీసీ (BC): 16%
- దివ్యాంగులు: 5%
- ప్రభుత్వ/ఔట్సోర్సింగ్/క్లాస్-4/పారిశుధ్య కార్మికులు: 10%
- జనరల్ కేటగిరీ: 50%
- మహిళా ప్రాధాన్యత: అన్ని కేటగిరీల్లో కలిపి 30% ఫ్లాట్లను మహిళలకు రిజర్వ్ చేశారు.
చెల్లింపుల వివరాలు (లబ్ధిదారుడి వాటా):
లబ్ధిదారుడు తన వాటా రూ. 6 లక్షలను విడతల వారీగా చెల్లించవచ్చు:
- దరఖాస్తు సమయం: రూ. 100 అప్లికేషన్ ఫీజు + రూ. 10,000 టోకెన్ అడ్వాన్స్ (కేటాయింపు జరగకపోతే ఈ డబ్బులు వెనక్కి ఇస్తారు).
- ప్రొవిజనల్ అలాట్మెంట్: రూ. 1 లక్ష
- ఆర్సీసీ (RCC) నిర్మాణం పూర్తి: రూ. 2 లక్షలు
- ఫినిషింగ్ దశ: రూ. 2 లక్షలు
- ఫ్లాట్ హ్యాండోవర్: మిగిలిన మొత్తం చెల్లించాలి.
ఎలా దరఖాస్తు చేయాలి? (ఆగస్టు 15 ఆఖరు తేదీ):
మీ-సేవ (MeeSeva) కేంద్రాలు, మీ-సేవ అధికారిక వెబ్సైట్ లేదా మీ-సేవ వాట్సాప్ సేవల ద్వారా దరఖాస్తు చేసుకోవచ్చు. అప్లై చేసే సమయంలో ఎలాంటి సర్టిఫికెట్లు సమర్పించాల్సిన అవసరం లేదు. దరఖాస్తుకు ఆగస్టు 15 చివరి తేదీ.
ఫ్లాట్లు నిర్మించే ప్రధాన ప్రాంతాలు:
కేపీహెచ్బీ, కౌకూర్ (మల్కాజిగిరి), రాయదుర్గం, జల్పల్లి, రెడ్హిల్స్, పాటిగడ్డ, గడ్డిఅన్నారం, బండ్లగూడ, పోచారం, మైలార్దేవ్పల్లి, గాజులరామారం, హకీంపేట్ దర్గా, జూబ్లీహిల్స్, అంబర్పేట్, బోయిన్పల్లి మరియు కుల్సుంపురా.