అంతర్జాతీయంగా ముడి చమురు (క్రూడ్ ఆయిల్) ధరలు మళ్లీ మండుతుండటంతో భారత్లో పెట్రోల్, డీజిల్ రేట్లు పెరుగుతాయేమోనని వాహనదారులు తీవ్ర ఆందోళన చెందారు. అయితే వారికి కేంద్ర ప్రభుత్వం బిగ్ రిలీఫ్ ఇచ్చింది. ప్రస్తుతం ధరలను పెంచే ఆలోచన ఏదీ లేదని స్పష్టం చేస్తూ, ప్రభుత్వ రంగ చమురు సంస్థలు జులై 24న కొత్త ధరల జాబితాను విడుదల చేశాయి. అంతర్జాతీయ మార్కెట్లో ఒత్తిడి ఉన్నప్పటికీ, నేడు రేట్లలో ఎలాంటి మార్పూ చేయకపోవడంతో ధరలు యథాతథంగా కొనసాగుతున్నాయి.
అమెరికా-ఇరాన్ మధ్య మళ్లీ మొదలైన ఉద్రిక్తతలు, గల్ఫ్ దేశాల్లో అలజడి మరియు కీలకమైన హర్ముజ్ జలసంధి మూసివేత భయాల కారణంగా ప్రపంచవ్యాప్తంగా క్రూడ్ ఆయిల్ ధరలు మళ్లీ పైపైకి చేరుతున్నాయి. గతంలో ఇరు దేశాల మధ్య శాంతి ఒప్పందం కుదిరినప్పుడు తగ్గిన ధరలు, ఇప్పుడు మళ్లీ యుద్ధ వాతావరణం నెలకొనడంతో ఆల్-టైమ్ రికార్డు దిశగా పరుగెడుతున్నాయి. ఈ యుద్ధం ఇలాగే కొనసాగితే భారత్లో పెట్రోల్, డీజిల్పై భారం పడటం ఖాయమనే ప్రచారం సాగుతోంది. త్వరలోనే కేంద్రం సామాన్యులకు షాక్ ఇవ్వబోతోందనే వార్తలు నెట్టింట వైరల్ అయ్యాయి.
ఈ నేపథ్యంలో ప్రతిరోజూ ఉదయం 6 గంటలకు విడుదలయ్యే నూతన రేట్లలో ఎలాంటి సవరణలు లేకపోవడం విశేషం. ప్రస్తుతం హైదరాబాద్లో లీటర్ పెట్రోల్ ధర రూ.115.59గా, డీజిల్ రూ.103.82గా, సీఎన్జీ రూ.97గా స్థిరంగా ఉన్నాయి. ఢిల్లీలో పెట్రోల్ రూ.102.12, డీజిల్ రూ.95.20, సీఎన్జీ రూ.83.09 పలుకుతుండగా.. ముంబైలో పెట్రోల్ రూ.111.18, డీజిల్ రూ.97.83, సీఎన్జీ రూ.86గా ఉంది.
అలాగే చెన్నైలో పెట్రోల్ రూ.107.77 (డీజిల్ రూ.99.55), బెంగళూరులో రూ.110.93 (డీజిల్ రూ.98.80), కోల్కతాలో రూ.113.47 (డీజిల్ రూ.99.82) వద్ద అందుబాటులో ఉన్నాయి. తిరువనంతపురంలో పెట్రోల్ ధర రూ.115.49 కాగా, పాట్నాలో రూ.113.35, జైపూర్లో రూ.112.66, గుర్గావ్లో రూ.102.77, భువనేశ్వర్లో రూ.109.92, చండీగఢ్లో అత్యల్పంగా రూ.98.10 వద్ద కొనసాగుతున్నాయి. మొత్తానికి అంతర్జాతీయ ఉద్రిక్తతలు నెలకొన్నప్పటికీ, ప్రస్తుతానికైతే పెట్రో మంటల నుంచి సామాన్యుడికి ఊరట లభించిందనే చెప్పాలి.