భారత జట్టు మాజీ కెప్టెన్, స్టార్ ఓపెనర్ రోహిత్ శర్మ మరో అరుదైన ఘనతను తన ఖాతాలో వేసుకున్నాడు. లిస్ట్-ఏ క్రికెట్లో 14,000 పరుగుల మైలురాయిని అందుకున్న భారత బ్యాటర్గా ప్రత్యేక గుర్తింపు పొందాడు. ఆఫ్ఘానిస్థాన్తో లక్నో వేదికగా జరిగిన రెండో వన్డే మ్యాచ్లో ఈ ఘనతను అందుకున్నాడు.
39 ఏళ్ల రోహిత్ శర్మ మ్యాచ్లో తన 10వ పరుగును పూర్తి చేసిన వెంటనే లిస్ట్-ఏ క్రికెట్లో 14,000 పరుగుల మార్క్ను దాటాడు. ప్రస్తుతం అతను ఈ ఫార్మాట్లో 357వ మ్యాచ్ ఆడుతున్నాడు. మొత్తం 14 వేలకుపైగా పరుగులు చేసిన రోహిత్ సగటు 46కు పైగా ఉంది. ఇందులో 37 సెంచరీలు, 74 అర్ధసెంచరీలు నమోదు చేశాడు.
2006లో లిస్ట్-ఏ అరంగేట్రం
రోహిత్ శర్మ ఫిబ్రవరి 2006లో లిస్ట్-ఏ క్రికెట్లో అరంగేట్రం చేశాడు. ఆసక్తికర విషయం ఏమిటంటే, అతని వన్డే అరంగేట్రానికి దాదాపు 16 నెలల ముందే లిస్ట్-ఏ కెరీర్ ప్రారంభమైంది. అయితే వన్డే క్రికెట్లో అతని అసలు ఆధిపత్యం 2013లో ఓపెనర్గా ప్రమోట్ అయిన తర్వాత మొదలైంది.
వన్డేల్లో అద్భుత గణాంకాలు
ప్రస్తుతం రోహిత్ శర్మ 284వ వన్డే మ్యాచ్ ఆడుతున్నాడు. 276 ఇన్నింగ్స్లో 11,600కుపైగా పరుగులు సాధించిన అతను 48కు పైగా సగటును నమోదు చేశాడు. అదేవిధంగా 61 అర్ధసెంచరీలు, 33 సెంచరీలు చేశాడు. వన్డేల్లో అత్యధిక సెంచరీలు చేసిన బ్యాటర్ల జాబితాలో రోహిత్ మూడో స్థానంలో ఉన్నాడు. ఈ జాబితాలో 54 సెంచరీలతో విరాట్ కోహ్లీ అగ్రస్థానంలో ఉండగా, 49 సెంచరీలతో సచిన్ టెండూల్కర్ రెండో స్థానంలో ఉన్నాడు.
మూడు డబుల్ సెంచరీలు.. ఎవరికీ సాధ్యం కాని రికార్డు
వన్డే క్రికెట్లో మూడు డబుల్ సెంచరీలు సాధించిన ఏకైక బ్యాటర్ కూడా రోహిత్ శర్మే. ఇప్పటివరకు మరే ఇతర బ్యాటర్ ఒకటి కంటే ఎక్కువ డబుల్ సెంచరీలు నమోదు చేయలేదు. అంతేకాకుండా 2014లో శ్రీలంకపై చేసిన 264 పరుగులతో వన్డే చరిత్రలో అత్యధిక వ్యక్తిగత స్కోరు రికార్డును కూడా తన పేరిట నమోదు చేసుకున్నాడు.
వన్డేల్లో అత్యధిక సిక్సర్లు
రోహిత్ శర్మ వన్డే క్రికెట్లో అత్యధిక సిక్సర్లు బాదిన బ్యాటర్గా కూడా చరిత్ర సృష్టించాడు. ప్రస్తుతం అతని ఖాతాలో 357కు పైగా సిక్సర్లు ఉన్నాయి. గతేడాది పాకిస్థాన్ మాజీ ఆల్రౌండర్ షాహిద్ అఫ్రిది (351 సిక్సర్లు) రికార్డును అధిగమించి అగ్రస్థానానికి చేరుకున్నాడు. వన్డేల్లో 300కు పైగా సిక్సర్లు బాదిన బ్యాటర్ల జాబితాలో రోహిత్, అఫ్రిది తర్వాత వెస్టిండీస్ దిగ్గజం క్రిస్ గేల్ (331) మాత్రమే ఉన్నాడు. ప్రస్తుతం క్రియాశీల ఆటగాళ్లలో ఇంగ్లండ్ స్టార్ బ్యాటర్ జోస్ బట్లర్ 184 సిక్సర్లతో రోహిత్కు అత్యంత దగ్గరలో ఉన్నాడు.