ఆటలోనూ, జీవిత పోరాటంలోనూ విజేతగా నిలిచిన ‘పెద్ది’ ప్రేక్షకుల హృదయాలను గెలుచుకుంది. మెగా పవర్ స్టార్ రామ్ చరణ్ ప్రధాన పాత్రలో, దర్శకుడు బుచ్చిబాబు తెరకెక్కించిన ఈ చిత్రం తాజాగా విడుదలై విజయవంతంగా ప్రదర్శితమవుతోంది. ‘పెద్ది’ పాత్రలో రామ్ చరణ్ తన అద్భుతమైన నటనతో అభిమానులను, సినీప్రియులను ఆకట్టుకుంటున్నారు. చాలా కాలం తర్వాత ఆయన ఖాతాలో భారీ హిట్ చేరిందని అభిమానులు సంబరాలు చేసుకుంటున్నారు.
ఈ నేపథ్యంలో సినిమా తొలి రోజు వసూళ్ల వివరాలను నిర్మాణ సంస్థ అధికారికంగా ప్రకటించింది. ప్రపంచవ్యాప్తంగా విడుదలైన మొదటి రోజే ‘పెద్ది’ రూ.135.36 కోట్ల గ్రాస్ కలెక్షన్లు సాధించినట్లు వెల్లడించింది. ఈ సందర్భంగా “బాక్సాఫీస్ ఛాంపియన్” అనే ట్యాగ్తో ప్రత్యేక పోస్టర్ను విడుదల చేసింది.
‘పెద్ది’ కథ ఇదే..
విజయనగరం జిల్లాలో కొండ దిగువన ఉన్న ఒక చిన్న గ్రామం కథకు నేపథ్యంగా నిలుస్తుంది. వందలాది మంది నివసిస్తున్నప్పటికీ ఆ గ్రామానికి ప్రభుత్వ రికార్డుల్లో ఎలాంటి గుర్తింపు ఉండదు. దీంతో ఆ గ్రామం పేరు చెప్పినా, అక్కడి ప్రజలు ఎక్కడికెళ్లినా చిన్నచూపునే ఎదుర్కొంటుంటారు.
అలాంటి గ్రామంలో పుట్టి పెరిగిన యువకుడే పెద్ది (రామ్ చరణ్). అతడు ప్రతిరోజూ విజయనగరానికి వెళ్లి కూలి పనులు చేస్తూ జీవనం సాగిస్తుంటాడు. వృత్తిరీత్యా కూలీ అయినప్పటికీ క్రికెట్లో మాత్రం అసాధారణ ప్రతిభ కనబరుస్తాడు. అతడి ఆటతీరు కారణంగా విజయనగరం, బొబ్బిలి ప్రాంతాల క్రికెట్ జట్లు వేలంలో అతడిని తమ జట్టులోకి తీసుకోవడానికి పోటీ పడుతుంటాయి.
అయితే అంతటి ప్రతిభావంతుడైన క్రికెటర్ అయిన పెద్ది, క్రికెట్ను వదిలి కుస్తీ క్రీడాకారుడిగా ఎందుకు మారాల్సి వచ్చింది? అతని జీవిత ప్రయాణంలో అప్పలసూరి (జగపతిబాబు), గౌర్ నాయుడు (శివరాజ్కుమార్) ఎలాంటి ప్రభావం చూపించారు? అలాగే అచ్చియమ్మ (జాన్వీ కపూర్) పాత్ర అతని జీవితంలో ఏ విధంగా ముడిపడింది? అనే ప్రశ్నలకు సమాధానం తెలుసుకోవాలంటే ‘పెద్ది’ చిత్రాన్ని వెండితెరపై చూడాల్సిందే.