తెలంగాణ వ్యాప్తంగా యాప్ ఆధారిత రవాణా, డెలివరీ సేవలు మంగళవారం (జూలై 22) పూర్తిగా నిలిచిపోనున్నాయి. తమ సమస్యలను పరిష్కరించాలని డిమాండ్ చేస్తూ ఓలా, ఉబెర్, ర్యాపిడో డ్రైవర్లతో పాటు స్విగ్గీ, జొమాటో, బ్లింకిట్, జెప్టో డెలివరీ బాయ్స్, గూడ్స్ ట్రాన్స్పోర్ట్ డ్రైవర్లు ఒకరోజు రాష్ట్రవ్యాప్త సమ్మెకు పిలుపునిచ్చారు.
ముషీరాబాద్లోని సీఐటీయూ (CITU) కార్యాలయంలో జరిగిన వివిధ కార్మిక సంఘాల సమావేశంలో ఈ సమ్మె నిర్ణయాన్ని అధికారికంగా ప్రకటించారు. ఈ బంద్ కారణంగా ప్రయాణికులు, సాధారణ ప్రజలు ఇబ్బందులు పడకుండా ముందుగానే ప్రత్యామ్నాయ మార్గాలను చూసుకోవాలని సూచించారు.
సమ్మెకు ఎందుకు దిగాల్సి వచ్చింది?
ఈ సందర్భంగా తెలంగాణ గిగ్ అండ్ ప్లాట్ఫామ్ వర్కర్స్ యూనియన్ వ్యవస్థాపక అధ్యక్షుడు షేక్ సలావుద్దీన్ మాట్లాడుతూ.. సుదీర్ఘకాలంగా పెండింగ్లో ఉన్న తమ సమస్యలపై ప్రభుత్వం, కంపెనీలు స్పందించకపోవడం వల్లే సమ్మె చేయాల్సి వస్తోందని చెప్పారు. ఈ బంద్ వల్ల ప్రజలకు కలిగే అసౌకర్యానికి క్షమాపణలు తెలిపారు.
“ఈ పోరాటం కేవలం చార్జీల పెంపు కోసం మాత్రమే కాదు.. వేలాది మంది గిగ్ కార్మికుల హక్కులు, సామాజిక భద్రత, గౌరవప్రదమైన జీవనోపాధి కోసం!” — షేక్ సలావుద్దీన్, గిగ్ వర్కర్స్ యూనియన్ నేత
గిగ్ కార్మికుల ప్రధాన డిమాండ్లు ఇవే:
- న్యాయమైన చార్జీలు: కనీస ‘బేస్ ఫేర్’ నిర్ణయించి, ప్రతి కిలోమీటర్కు, ప్రతి నిమిషానికి తగిన రేట్లను అమలు చేయాలి.
- కార్మిక సంక్షేమ బోర్డు: గిగ్ కార్మికుల కోసం ప్రత్యేకంగా ‘కార్మిక సంక్షేమ బోర్డు’ ఏర్పాటు చేయాలి.
- భద్రత & నియమాలు: గిగ్ వర్కర్స్ రూల్స్ను వెంటనే వర్తింపజేయడంతో పాటు మోటార్ వెహికల్ అగ్రిగేటర్ గైడ్లైన్స్-2025ను పూర్తిస్థాయిలో అమలు చేయాలి.
- సంస్థలపై నియంత్రణ: అగ్రిగేటర్ కంపెనీల దోపిడీకి చెక్ పెడుతూ కఠిన నిబంధనలు తీసుకురావాలి.
ఆగస్టు 8 నుంచి నిరవధిక సమ్మె హెచ్చరిక!
ప్రభుత్వం, అగ్రిగేటర్ కంపెనీలు తమ డిమాండ్లపై వెంటనే స్పందించకపోతే ఆగస్టు 8 నుంచి రాష్ట్రవ్యాప్తంగా నిరవధిక సమ్మెకు దిగుతామని యూనియన్ నేతలు స్పష్టమైన హెచ్చరిక జారీ చేశారు.
Telangana News: