ప్రపంచవ్యాప్తంగా కోట్ల మంది ఫుట్బాల్ అభిమానులు ఎప్పుడెప్పుడా అని ఎదురుచూస్తున్న ‘ఫిఫా వరల్డ్ కప్ 2026’ ఫైనల్ సమరానికి సమయం ఆసన్నమైంది. ఈ నెల 20న జరిగే మెగా ఫైనల్లో డిఫెండింగ్ ఛాంపియన్ అర్జెంటీనా, బలమైన స్పెయిన్ జట్లు తలపడనున్నాయి. హేమాహేమీలను మట్టికరిపించి టైటిల్ పోరుకు చేరిన ఈ రెండు జట్ల మధ్య మ్యాచ్ ఉత్కంఠ రేపుతోంది. మన దేశంలో క్రికెట్తో పోలిస్తే ఫుట్బాల్కు ఆదరణ కాస్త తక్కువే అయినా (కేరళ, పశ్చిమ బెంగాల్ మినహా).. వరల్డ్ కప్ ఫైనల్ కావడంతో దేశవ్యాప్తంగా క్రీడాభిమానుల్లో ఆసక్తి నెలకొంది.
అయితే, ఈ ఫుట్బాల్ ఫైనల్తో భారత క్రికెట్ అభిమానులకు, ముఖ్యంగా టీమిండియాకు ఒక విచిత్రమైన ‘వరల్డ్ కప్ సెంటిమెంట్’ ముడిపడి ఉంది. ఈ ఫైనల్లో అర్జెంటీనా ఓడిపోయి.. స్పెయిన్ గెలవాలని భారత క్రికెట్ ఫ్యాన్స్ బలంగా కోరుకుంటున్నారు. ఇంతకీ ఏంటా సెంటిమెంట్?
2011 మ్యాజిక్ రిపీట్ అవుతుందా?
క్రీడల్లో సెంటిమెంట్లు, లెక్కలను అభిమానులు బాగా నమ్ముతారు. ఇప్పుడు సోషల్ మీడియాలో వైరల్ అవుతున్న క్రేజీ కనెక్షన్ ఇవే:
- స్పెయిన్ గెలిస్తే – భారత్కు గోల్డ్: చివరిసారిగా స్పెయిన్ జట్టు 2010లో ఫిఫా వరల్డ్ కప్ గెలిచింది. ఆ మరుసటి ఏడాదే (2011లో) ధోనీ నాయకత్వంలోని టీమిండియా వన్డే వరల్డ్ కప్ గెలిచి చరిత్ర సృష్టించింది.
- అర్జెంటీనా గెలిస్తే – భారత్కు నిరాశ: అర్జెంటీనా జట్టు గతంలో 2022లో ఫిఫా వరల్డ్ కప్ గెలిచింది. ఆ మరుసటి ఏడాదే (2023లో) రోహిత్ శర్మ నేతృత్వంలోని టీమిండియా వన్డే వరల్డ్ కప్ ఫైనల్ వరకు వెళ్లి ఆస్ట్రేలియా చేతిలో ఓడిపోయింది.
2027 వరల్డ్ కప్పై కన్ను!
ఈ విచిత్రమైన లెక్కల ప్రకారం.. ఇప్పుడు 2026 ఫిఫా వరల్డ్ కప్లో అర్జెంటీనా మళ్లీ గెలిస్తే, రాబోయే 2027 వన్డే వరల్డ్ కప్లో టీమిండియా రన్నరప్గానే మిగిలిపోతుందని ఫ్యాన్స్ భయపడుతున్నారు. అదే ఈసారి స్పెయిన్ కనుక ట్రోఫీ కొడితే.. సెంటిమెంట్ ప్రకారం 2027 వన్డే వరల్డ్ కప్ మనదే అని ధీమా వ్యక్తం చేస్తున్నారు.
వినడానికి ఇది కాస్త వింతగా అనిపించినా.. స్పోర్ట్స్లో ఇలాంటి సెంటిమెంట్లకు ఉండే క్రేజే వేరు. మరి ఈ నెల 20న జరిగే ఫైనల్లో గెలిచి ఏ జట్టు కప్ను ముద్దాడుతుందో, ఆ ప్రభావం మన టీమిండియాపై ఎలా ఉండబోతుందో చూడాలి!