బంగారం, వెండి ప్రియులకు మళ్లీ షాక్ తగిలింది. గత మూడు రోజులుగా తగ్గుముఖం పట్టిన పసిడి ధరలకు శనివారం రోజున బ్రేక్ పడింది. అంతర్జాతీయంగా నెలకొన్న భౌగోళిక ఉద్రిక్తతలు, ఆర్థిక అస్థిరతల కారణంగా శనివారం ఉదయాన్నే బంగారం ధరలు ఒక్కసారిగా భగ్గుమన్నాయి.
గ్లోబల్ మార్కెట్లో సురక్షితమైన పెట్టుబడిగా బంగారానికి డిమాండ్ పెరగడంతో దేశీయంగానూ ధరలు మళ్లీ పైపైకి ఎగిశాయి.హైదరాబాద్లో 24 క్యారెట్ల 10 గ్రాముల బంగారం ధర నిన్నటితో పోలిస్తే రూ.710 పెరిగి రూ.1,55,130 వద్ద ట్రేడవుతుండగా, 22 క్యారెట్ల 10 గ్రాముల బంగారం ధర రూ.650 పెరిగి రూ.1,42,200 వద్ద కొనసాగుతోంది. ఇదే తరహా ధరలు విజయవాడ మరియు విశాఖపట్నం నగరాల్లోనూ నమోదయ్యాయి.
దేశ రాజధాని ఢిల్లీలో 24 క్యారెట్ల 10 గ్రాముల బంగారం ధర అత్యధికంగా రూ.1,55,280 వద్ద ఉండగా, 22 క్యారెట్ల రేటు రూ.1,42,350 వద్ద పలికింది. బెంగళూరులో 24 క్యారెట్ల బంగారం ధర రూ.1,55,130 కాగా, చెన్నైలో 24 క్యారెట్ల పసిడి రేటు రూ.1,54,910 వద్ద నమోదైంది.
మరోవైపు బంగారం ధరలు భగ్గుమన్నప్పటికీ వెండి రేట్లు మాత్రం స్థిరంగానే కొనసాగుతున్నాయి. దేశ రాజధాని ఢిల్లీ మరియు బెంగళూరు నగరాల్లో కిలో వెండి ధర రూ.2,50,000 వద్ద ట్రేడవుతుండగా, హైదరాబాద్ మరియు చెన్నై నగరాల్లో మాత్రం కిలో వెండి ధర రూ.2,55,000 వద్ద స్థిరంగా కొనసాగుతోంది.
పండుగల సీజన్ దగ్గరపడుతుండటంతో ధరల పెరుగుదల కొనుగోలుదారులను కొంత ఆందోళనకు గురిచేస్తోంది.