నేషనల్ బోర్డ్ ఆఫ్ ఎగ్జామినేషన్స్ ఇన్ మెడికల్ సైన్సెస్ (NBEMS) నిర్వహించే నీట్ పీజీ 2026 (NEET-PG 2026) ప్రవేశ పరీక్షకు సిద్ధమవుతున్న అభ్యర్థులకు అధికారులు కీలక ప్రకటన విడుదల చేశారు. సాంకేతిక లోపాల (Technical Glitches) కారణంగా కొంతమంది అభ్యర్థులకు తప్పుడు పరీక్షా కేంద్రాల (Exam Centres) వివరాలు వెళ్లినట్లు ఎన్‌బీఈఎంఎస్‌ బుధవారం స్పష్టం చేసింది.

ఈ పొరపాటును తక్షణమే సరిదిద్ది, సరైన సమాచారంతో కూడిన కొత్త ఎస్‌ఎంఎస్‌లు (SMS), ఈ-మెయిళ్లను (E-mails) అభ్యర్థుల రిజిస్టర్డ్ నంబర్లకు పంపినట్లు బోర్డు వెల్లడించింది.

పరీక్ష కేంద్రాలపై అధికారుల విజ్ఞప్తి:

• పాత మెసేజ్లు నమ్మవద్దు: మునుపు వచ్చిన మెసేజ్‌లను పరిగణనలోకి తీసుకోవద్దని అధికారుల సూచించారు.
• లాగిన్ అయి చెక్ చేసుకోండి: అభ్యర్థులు వెంటనే NBEMS అధికారిక వెబ్‌సైట్‌లో లాగిన్ అయి, తమకు కేటాయించిన సరికొత్త పరీక్షా కేంద్రాన్ని సరిచూసుకోవాలని కోరారు.
• నకిలీ వార్తల పట్ల అప్రమత్తత: సోషల్ మీడియాలో వస్తున్న అనధికారిక, నకిలీ వార్తలను నమ్మవద్దని విజ్ఞప్తి చేశారు.
• పరీక్ష తేదీ: మెడికల్ పీజీ కోర్సుల్లో ప్రవేశాల కోసం ఈ నెల 30న నీట్ పీజీ పరీక్ష జరగనుంది.

అప్లికేషన్‌ తప్పుల సరిదిద్దడానికి ఆగస్టు 15 చివరి తేదీ:

దరఖాస్తు ప్రక్రియలో ఏవైనా పొరపాట్లు ఉంటే సరిచేసుకోవడానికి బోర్డు మరో ఆఖరి అవకాశాన్ని కల్పించింది.

• సరిదిద్దాల్సిన వివరాలు: అప్లికేషన్‌లో అభ్యర్థుల ఫోటో, సంతకం (Signature), బొటనవేలి ముద్ర (Thumb Impression) సరిగా లేని వారు వాటిని అప్‌డేట్ చేయాలి.
• చివరి గడువు: ఆగస్టు 15, రాత్రి 11:55 గంటల వరకు మాత్రమే ఎడిట్ చేసుకునే అవకాశం ఉంది.
• దరఖాస్తు తిరస్కరణ ప్రమాదం: నిర్ణీత గడువులోగా నిబంధనలకు అనుగుణంగా తప్పులు సరిదిద్దకపోతే అప్లికేషన్‌ను తిరస్కరిస్తామని అధికారులు హెచ్చరించారు.
• యాక్టివ్ నంబర్లు: కౌన్సెలింగ్ ప్రక్రియ పూర్తిగా ముగిసే వరకు అభ్యర్థులు తమ రిజిస్టర్డ్ మొబైల్ నంబర్ మరియు ఈ-మెయిల్ ఐడీలను యాక్టివ్‌గా ఉంచుకోవాలని స్పష్టం చేశారు.