ముఖ్యమంత్రి నారా చంద్రబాబు నాయుడు అధ్యక్షతన జరిగిన ఆంధ్రప్రదేశ్ మంత్రివర్గ సమావేశం ముగిసింది. రాష్ట్రంలో మౌలిక వసతులు, విద్య, వ్యవసాయం, ఉద్యోగావకాశాల కల్పనే లక్ష్యంగా ఈ సమావేశంలో పలు సంచలన నిర్ణయాలకు ఆమోదముద్ర వేశారు.
కేబినెట్ భేటీలోని ముఖ్యాంశాలు:
- 3,168 ప్రభుత్వ పోస్టుల భర్తీ: నిరుద్యోగ యువతకు శుభవార్త అందిస్తూ.. వివిధ్య శాఖల్లో ఖాళీగా ఉన్న 3,168 ప్రభుత్వ ఉద్యోగాల భర్తీకి కేబినెట్ ఆమోదం తెలిపింది. త్వరలోనే దీనికి సంబంధించిన నియామక ప్రక్రియ ప్రారంభం కానుంది.
- భోగాపురం ఎయిర్పోర్ట్ పనుల వేగవంతం: భోగాపురం అంతర్జాతీయ విమానాశ్రయం ప్రారంభోత్సవ ఏర్పాట్లపై కేబినెట్ విస్తృతంగా చర్చించింది. మిగిలిన పనులన్నింటినీ నిర్ణీత గడువులోగా పూర్తి చేసి, ప్రారంభానికి సిద్ధం చేయాలని అధికారులను ఆదేశించింది.
- ప్రత్యేక విద్యార్థులకు ప్రత్యేక డిగ్రీ కళాశాల: బాపట్ల జిల్లాలో వినికిడి లోపం ఉన్న (చెవిటి, మూగ) విద్యార్థుల కోసం ఒక ప్రత్యేక డిగ్రీ కళాశాలను ఏర్పాటు చేయాలని నిర్ణయించారు.
- గోదావరి పుష్కరాలకు నిధులు: రాబోయే గోదావరి పుష్కరాల నిర్వహణ, భద్రతా ఏర్పాట్ల కోసం రూ. 50 కోట్లు మంజూరు చేశారు. భక్తులకు ఎలాంటి అసౌకర్యం కలగకుండా ముందస్తు ఏర్పాట్లు చేయాలని అధికారులకు స్పష్టం చేశారు.
- మార్క్ఫెడ్కు ప్రభుత్వ గ్యారంటీ: ఏపీ మార్క్ఫెడ్ (AP MARKFED) పొందే రూ. 300 కోట్ల రుణానికి రాష్ట్ర ప్రభుత్వం పూచీకత్తు (గ్యారంటీ) ఇచ్చేందుకు ఆమోదం తెలిపింది.
వర్షాభావం, వ్యవసాయ పరిస్థితులపై సీఎం సమీక్ష:
రాష్ట్రంలో ఎల్ నినో ప్రభావం, వర్షపాతం, సాగునీటి లభ్యతపై ముఖ్యమంత్రి చంద్రబాబు ప్రత్యేకంగా సమీక్ష నిర్వహించారు.
- ప్రస్తుతం సాగులో ఉన్న పంటల విస్తీర్ణం, రిజర్వాయర్లలో నీటి నిల్వలపై సమగ్ర నివేదిక ఇవ్వాలని వ్యవసాయ, సాగునీటి పారుదల శాఖలను ఆదేశించారు.
- రాష్ట్రంలో ఎక్కడా తాగునీరు, సాగునీటికి కొరత రాకుండా ముందస్తు ప్రణాళికలతో సిద్ధంగా ఉండాలని, అన్ని శాఖలు సమన్వయంతో పనిచేయాలని సూచించారు.