బంగాళాఖాతంలో ఏర్పడిన అల్పపీడనం, రానున్న భారీ వర్షాల నేపథ్యంలో ఆంధ్రప్రదేశ్ ప్రభుత్వం పూర్తిస్థాయిలో అప్రమత్తమైంది. హోం, విపత్తుల నిర్వహణ శాఖ మంత్రి వంగలపూడి అనిత కలెక్టర్లు, ఎస్పీలు, ఏపీ విపత్తుల నిర్వహణ సంస్థ (APSDMA) ఎండీ ప్రఖర్ జైన్ సహా ఉన్నతాధికారులతో అత్యవసర టెలికాన్ఫరెన్స్ నిర్వహించి పరిస్థితిని సమీక్షించారు.
అధికారుల తాజా అంచనాల ప్రకారం ప్రస్తుత వాతావరణ వ్యవస్థ దక్షిణ ఒడిశా–ఉత్తరాంధ్ర తీరాల వైపు కదులుతోంది. దీంతో రానున్న రోజుల్లో రాష్ట్రంలోని పలు జిల్లాల్లో భారీ నుంచి అతిభారీ వర్షాలు కురిసే అవకాశం ఉందని అధికారులు తెలిపారు.
ప్రభావిత జిల్లాల్లో ముందస్తు చర్యలు
భారీ వర్షాల దృష్ట్యా అధికారులు పూర్తిస్థాయిలో అప్రమత్తంగా ఉండాలని మంత్రి అనిత ఆదేశించారు. ప్రభావిత జిల్లాల అధికారులకు ముందస్తు చర్యలపై స్పష్టమైన సూచనలు జారీ చేశారు. ఒడిశాలో కురిసే భారీ వర్షాల ప్రభావంతో వంశధార, నాగావళి నదులు పొంగే అవకాశం ఉన్నందున, సరిహద్దు ఒడిశా జిల్లాల అధికారులతో నిరంతరం సమన్వయం కొనసాగించాలని సూచించారు.
అలాగే సహాయక చర్యల కోసం SDRF, NDRF బృందాలను సిద్ధంగా ఉంచాలని ఆదేశించారు. పరిస్థితి అవసరమైతే తీర ప్రాంతాల్లోని లోతట్టు ప్రాంతాల ప్రజలను ముందుగానే సురక్షిత ప్రాంతాలకు తరలించాలని స్పష్టం చేశారు. ప్రజలకు ఎలాంటి ఇబ్బందులు కలగకుండా క్షేత్రస్థాయిలో ముందస్తు చర్యలు చేపట్టాలని అధికారులను ఆదేశించారు.
24 గంటల కంట్రోల్ రూమ్‌లు.. ప్రజలకు హెచ్చరిక
వాగులు, పొంగిపొర్లే కాజ్‌వేలు, ముంపు ప్రాంతాల వద్ద తప్పనిసరిగా హెచ్చరిక బోర్డులు ఏర్పాటు చేయాలని మంత్రి అనిత ఆదేశించారు. అన్ని కంట్రోల్ రూమ్‌లను 24 గంటలూ అందుబాటులో ఉంచి, వాతావరణ పరిస్థితులను నిరంతరం పర్యవేక్షించాలని సూచించారు.
తీర ప్రాంతాల్లో గంటకు 50 నుంచి 60 కిలోమీటర్ల వేగంతో ఈదురుగాలులు వీచే అవకాశం ఉన్నందున ప్రజలు అప్రమత్తంగా ఉండాలని మంత్రి హెచ్చరించారు. చెట్లు, భారీ హోర్డింగులు, శిథిలావస్థలో ఉన్న ఇళ్ల సమీపంలో ఉండకూడదని సూచిస్తూ, ప్రభుత్వ వాతావరణ హెచ్చరికలను తప్పనిసరిగా పాటించాలని ప్రజలకు విజ్ఞప్తి చేశారు.
సెప్టెంబర్ 22–24 మధ్య అతిభారీ వర్షాల అవకాశం
తాజా వాతావరణ అంచనాల ప్రకారం సెప్టెంబర్ 22 నుంచి 24 వరకు ఆంధ్రప్రదేశ్‌లోని పలు ప్రాంతాల్లో భారీ నుంచి అతిభారీ వర్షాలు కురిసే అవకాశం ఉందని వాతావరణ శాఖ వెల్లడించింది. అధికారులు, ప్రజలు అప్రమత్తంగా ఉండి అవసరమైన జాగ్రత్తలు తీసుకోవాలని సూచించింది.