ఫిఫా ప్రపంచకప్(FIFA World Cup) 2026లో ప్రతి మ్యాచ్ కొత్త రికార్డులకు వేదికగా మారుతోంది. ఎన్నో ఏళ్లుగా విజయాల కోసం ఎదురుచూస్తున్న జట్లు తమ నిరీక్షణకు తెరదించుకుంటున్నాయి. తాజాగా స్కాట్లాండ్(Scotland) కూడా అలాంటి అరుదైన ఘనతను సొంతం చేసుకుంది.
ప్రపంచకప్లో తమ తొలి మ్యాచ్లో హైతీని 1-0 తేడాతో ఓడించిన స్కాట్లాండ్, 36 ఏళ్ల తర్వాత ప్రపంచకప్ వేదికపై విజయాన్ని నమోదు చేసింది. చివరిసారిగా 1990 ప్రపంచకప్లో స్వీడన్(Sweden)పై 2-1 తేడాతో గెలిచిన స్కాట్లాండ్, ఆ తర్వాత ప్రపంచకప్లో విజయాన్ని అందుకోలేకపోయింది. అంతేకాదు 1998 తర్వాత ఏ ప్రధాన అంతర్జాతీయ టోర్నమెంట్లోనూ గెలుపు రుచి చూడని జట్టు ఇప్పుడు ఆ లోటును భర్తీ చేసింది.
తొలి అర్ధభాగంలోనే నిర్ణయాత్మక గోల్
బలాబలాల పరంగా చూస్తే స్కాట్లాండ్, హైతీ జట్ల మధ్య పెద్దగా తేడా కనిపించలేదు. అయినప్పటికీ మ్యాచ్లో కీలకమైన అవకాశాన్ని స్కాట్లాండ్ సద్వినియోగం చేసుకుంది. 28వ నిమిషంలో జాన్ మెక్గిన్ అద్భుతమైన గోల్ సాధించి తన జట్టుకు ఆధిక్యం అందించాడు. చివరకు అదే గోల్ మ్యాచ్ ఫలితాన్ని నిర్ణయించింది.
హైతీ పోరాడినా ఫలితం లేదు
మ్యాచ్ మొత్తం హైతీ జట్టు గట్టిగా పోరాడింది. గోల్ కోసం మొత్తం 13 సార్లు ప్రయత్నించినప్పటికీ స్కాట్లాండ్ రక్షణ శ్రేణిని ఛేదించలేకపోయింది. మరోవైపు స్కాట్లాండ్ కేవలం 8 సార్లు మాత్రమే గోల్పై దాడులు చేసింది. అందులో ఒక ప్రయత్నాన్ని గోల్గా మలచి కీలక విజయాన్ని ఖాతాలో వేసుకుంది. ఈ విజయంతో స్కాట్లాండ్ ప్రపంచకప్ ప్రయాణాన్ని విజయవంతంగా ప్రారంభించడమే కాకుండా, దాదాపు నాలుగు దశాబ్దాల నిరీక్షణకు ముగింపు పలికింది.