USA Elections: అమెరికా కాంగ్రెస్ బరిలో ఇద్దరు మనోళ్లు..

అమెరికా కాంగ్రెస్ ఎన్నికల వేళ ఆసక్తికర పరిణామం చోటుచేసుకుంది. వాషింగ్టన్​ రాష్ట్రంలోని 7వ కాంగ్రెషనల్​ డిస్ట్రిక్ట్ స్థానంలో ఇద్దరు భారతీయ అమెరికన్లు నేరుగా తలపడటానికి రంగాన్ని సిద్ధం చేసుకున్నారు. ఈ నియోజకవర్గం నుంచి ఐదుసార్లు విజయం సాధించిన డెమోక్రటిక్ పార్టీ అభ్యర్థి ప్రమీలా జయపాల్​తో, రిపబ్లికన్ అభ్యర్థి నీరవ్ సేఠ్ రేసులో నిలిచారు.

ప్రైమరీ ఎన్నికల్లో జయపాల్ హవా

వాషింగ్టన్ రాష్ట్రంలో అమలులో ఉన్న ‘ఓపెన్ ప్రైమరీ’ విధానం ప్రకారం, పార్టీల సరిహద్దులతో సంబంధం లేకుండా మొదటి రెండు స్థానాల్లో నిలిచే అభ్యర్థులు నవంబర్‌లో జరిగే ప్రధాన ఎన్నికలకు అర్హత సాధిస్తారు.

ఈ క్రమంలో మంగళవారం నిర్వహించిన ఆల్-పార్టీ ప్రైమరీ ఓటింగ్‌లో డెమోక్రాట్లకు కంచుకోట లాంటి ఈ స్థానంలో ప్రమీలా జయపాల్ ఏకంగా 83.3 శాతం ఓట్లతో తిరుగులేని విజయాన్ని అందుకున్నారు. పోటీలో ఉన్న నీరవ్ సేఠ్ 10.8 శాతం ఓట్లతో రెండో స్థానానికి పరిమితమయ్యారు. సుమారు 53 శాతం ఓట్ల లెక్కింపు పూర్తయిన తర్వాత ఈ వివరాలను ‘ది అసోసియేటెడ్ ప్రెస్’ (AP) ధ్రువీకరించింది.

నాయకుల నేపథ్యం & ప్రధాన ప్రచారాంశాలు

1. ప్రమీలా జయపాల్ (డెమోక్రాటిక్ అభ్యర్థి):

• నేపథ్యం: చెన్నైలో జన్మించిన 60 ఏళ్ల ప్రమీల, తన 16వ ఏట ఉన్నత చదువుల కోసం అమెరికా (జార్జ్‌టౌన్ యూనివర్సిటీ) వెళ్లారు. 2016లో యుఎస్ హౌస్ ఆఫ్ రిప్రజెంటేటివ్స్‌కు ఎన్నికైన తొలి సౌత్ ఏసియన్ అమెరికన్ మహిళగా చరిత్ర సృష్టించారు.
• పదవులు: డెమోక్రాటిక్ పార్టీలో బెర్నీ సాండర్స్ మద్దతుతో కీలక నేతగా ఎదిగిన ఈమె, ‘కాంగ్రెషనల్ ప్రోగ్రెసివ్ కాకస్’కు ‘ఛైర్ ఎమెరిటా’గా వ్యవహరిస్తున్నారు.
• ప్రచారాంశాలు: ప్రజాస్వామ్య పరిరక్షణ, వేతనాల పెంపు, నివాస వసతులు, గర్భస్రావ హక్కులు మరియు పర్యావరణ పరిరక్షణ.

2. నీరవ్ సేఠ్ (రిపబ్లికన్ అభ్యర్థి):

• నేపథ్యం: అహ్మదాబాద్‌కు చెందిన 40 ఏళ్ల నీరవ్, 2008లో విద్యార్థిగా అమెరికా వెళ్లి, 2011లో మెరైన్స్ విభాగంలో ఎయిర్​క్రాఫ్ట్ మెకానిక్​గా సేవలు అందించారు. అనంతరం వాషింగ్టన్​లోని లేక్​వుడ్​లో పోలీసుగా పనిచేశారు.
• రాజకీయ ప్రవేశం: వ్యాపారవేత్తగా మారిన తర్వాత తన వ్యాపార సంస్థల్లో వరుసగా దొంగతనాలు జరగడం, పాలనా యంత్రాంగం వైఫల్యం చెందడంతో విసిగిపోయి 2023లో రాజకీయ అరంగేట్రం చేశారు.
• ప్రచారాంశాలు: శాంతిభద్రతల పరిరక్షణ (లా అండ్ ఆర్డర్), పెరిగిన జీవన వ్యయాల నియంత్రణ.

ఫలితం ఎలా ఉండొచ్చు?

సియాటెల్, దాని పరిసర ప్రాంతాలతో కూడిన ఈ 7వ కాంగ్రెషనల్ డిస్ట్రిక్ట్‌లో 2016 నుంచి ప్రమీలా జయపాల్ వరుసగా గెలుస్తూ వస్తున్నారు. ఇక్కడ డెమోక్రాటిక్ పార్టీకి ఉన్న బలమైన పట్టు దృష్ట్యా, రిపబ్లికన్ అభ్యర్థి నీరవ్ సేఠ్‌కు రాబోయే నవంబర్ ఎన్నికల్లో విజయం సాధించడం అంత తేలిక కాదని రాజకీయ విశ్లేషకులు భావిస్తున్నారు.